07 febbraio 2009

L'archivi di Tiziano Tessitori

Vuê a Sedean al è stât presentât l'archivi dal Senatôr Tiziano Tessitori. Su La Vita Cattolica e je une pagjine une vore interessante che e fevele di chest progjet e de vite dal Senatôr Tessitori. Fracait su la foto par lei miôr.
Un biel intervent ancje di William Cisilino sul Gazzettino (tai coments) e su lengheNET.

1 commento:

Christian Romanini ha detto...

Sul Gazzettino di domenie 08/02/09:

Il grant regâl di Tessitori, «plui autonomist che democristian»

di William Cisilino

Îr a Sedean la famee di Tiziano Tessitori i à fat un grant regâl al Friûl: un archivi di 3840 volums – catalogâts de Universitât dal Friûl e ospitâts intune sezion di pueste de biblioteche comunâl – che al judarà studiôs e passionâts a profondî cetancj aspiets de storie e de culture locâl, ma soredut une des figuris plui impuartantis de storie furlane resinte.
Tessitori al è ricuardât par jessi stât il “pari” de nestre Regjon, ma la sô ativitât publiche e fo cetant plui articolade. Subit dopo de Grande Vuere al fo tra i fondadôrs des “Leghis blancjis” e – dopo il cidin fuarçât intant dal Fassisim – al fondà la “Associazion pe autonomie dal Friûl” par po deventâ deputât de Costituente pe DC. Il so “cursus honorum” politic lu puartà fint ae incarghe di Ministri, Alt Comissari pe Sanitât e sotsegretari. Nol va dismenteât, po, che al fo ancje ideadôr e fondadôr dal “Ente Friuli nel Mondo”, president de “Societât Filologjiche Furlane” e, dilunc di dute la sô vite, passionât inteletuâl e scritôr. Un “politic di altris timps”, in sumis, come che a àn ametût i stes politics di vuê intant de scree dal archivi.
Se, dut câs, o vessin di dî in struc ce che al rapresentà Tessitori pal Friûl o crôt che no sedin peraulis miôr di chês di Berzanti, prin president (Dc) de nestre Regjon, che, cuntune vene polemiche, lu definive “plui autonomist che democristian”. Tant al è vêr che, inte sô bataie pe Regjon, la Dc i creà plui problemas che altri e, in non dal Friûl, al ve a ce fâ cun personis che propit democristianis no lu jerin: par esempli Felix Marchi e Josef Marchet, fondadôrs dal sfuei autonomist “Patrie dal Friûl” e il zovin Pier Paolo Pasolini.
L’archivi al permetarà dal sigûr di fâ vignî fûr ancje un altri aspiet de storie politiche di Tessitori: lis grandis delusions che al à scugnût patî e che justamentri îr si à lassât un tic in bande par concentrâsi su lis robis positivis. Ma chestis delusions a forin, e tantis. Prin di dut Tessitori nol voleve la “Regione Friuli-Venezia Giulia”, si ben la “Regione Friuli”, come che e veve previodût la Costituente intune prime stesure de Cjarte costituzionâl. Nome cuant che al viodè la cape mâl taiade e il riscjo di lâ a finî sot dal Venit, Tessitori al tirà fûr dal cjapiel chel compromès, ma di male voe. Cun dut a chel, la Regjon e spietâ inmò 15 agns par jessi metude in pîts parcè che une disposizion transitorie le blocà fint al 1963. Ancje il gnûf Statût de Regjon nol plasè cuissà ce a Tessitori, soredut pal fat che la capitâl e fo metude a Triest impen che a Udin. Su chest cantin, dongje des motivazions politichis e economichis, nol disdegnà cualchi tacade: “Mentre Udine era la capitale di uno Stato più grande del Ducato di Milano e del Ducato di Savoia – al disè intun discors uficiâl in Senât – Trieste era un villaggio di pescatori e di contadini”. La delusion plui grande, dut câs, a forin i furlans, o miôr, il caratar sotan dai furlans. Chest fat lu testemoneà cuntune letare a Marchet subit dopo dal otigniment de autonomie speciâl. “Jo mi spietavi un grant sclop di calôr – al scrivè Tessitori – une grande fieste e une sflameade di fede rinovade e ancjemò plui ferme. Invecit mi à parût che il Friûl al restàs scuasit frêt, pôc mancul che insensibil. In altris sîts la gnove di chel ricognossiment e varès dismot fûr manifestazions e luminariis e sbandieraments: e il Friûl, cidin o scuasit”. Un cidin crevât dome dal sunsûr di une bombe: chê che e sclopà denant di cjase sô, la gnot fra il 21 e il 22 di lui 1947. Chest al fo l’unic “grazie” di chei dîs. Il Friûl al è ancjemò cetant in debit cun Tessitori. Sperìn, inalore, che chest archivi al sedi un prin pas par tacâ a tornâi alc cui fats, e no dome cu lis peraulis.