05 febbraio 2007

Vinars a Sant Denêl: conference su lis scovacis

Vinars che al ven a Sant Denêl aes 19.00 li de biblioteche Guarneriane, i Lions a àn inmaneade une conference par fevelâ di scovacis.
A saran presints ancje Lorenzo Cozianin, president de comunitât colinâr, Lorenzo Tosolini, sindic di Pasian di Prât che si è declarât disponibil a vê sul teritori dal so comun un "brusadôr di scovacis".
La robe che mi fâs zirâ lis scjatis al è che a continuin a platâsi daûr des peraulis: ancje sul gjornâl a fevelin simpri di "termovalorizzatore". Ma isal mai pussibil che no si puedi doprâ lis peraulis e clamâ lis robis cul lôr non: il "termovalorizzatore" prin di dut al è un "brusadôr di scovacis" che al fâs cinise di scovacis. Valorizial lis scovacis parcè che cul cjalt al fâs energjie? Bon al fasarà ancje energjie, no volarès che par risolvi 2 problemis (scovacis e energjie), si fasès un dam plui grant.
Lu ai za dit ancje se cualchidun mi cride: cirìn di risolvi i problemis par ordin, e no stin a doprâ la scuse de energjie par legjitimâ un sielte come chê dal "brusadôr di scovacis" (che se al fos tant biel, parcè no lu clamino "inceneritore" come cualchi an indaûr?).
E pe energjie o vin bisugne di plui tecnologjie che e eviti di straçâ lis fonts energjetichis che za a son. Al è come meti aghe intun colepaste: se no tu stropis cualchi busute, no tu varâs mai avonde aghe par jemplâ. Tachìn a sierâ cualchi buse, a otimizâ ce che o vin, cirìn di miorâ chei catafalcs che a son ator... e dome se dopo une atente politiche di consums e cuintri la energjie straçade no varìn nissun riscuintri, alore si podarà incressi il numar di centrâls e di "brusadôrs di scovacis".

2 commenti:

thermonuke ha detto...

Mi spavente dome Cozianin, se al tache cun sarò breve e vegnin 4 a binore.

Christian Romanini ha detto...

Biele la batude... dut câs: scovacis, centrâls, energjie e "brusadôrs di scovacis... e je ancje cuestion di bêçs. Provâ a domandâ a chei che a àn "termovalorizât" l'implant di Rivis Darcjan... Ancje cuant che al è vignût a Maian, al semeave che al Comunitât colinâr e ves di stâ sù dome su lis scovacis... e chest nol è il massim par un teritori che si svante di jessi inmò chel "piçul struc di univiers" che al diseve il Nievo. Si fevele ancje di Agenda21, aiar bon e specialitâts tipichis locâls... mi disêso cemût che al podarès resisti il microclime che al fâs cussì bon il pressut di Sant Denêl? Se al è microclime al vûl dî ancje che al è fragjil e duncje un "brusadôr di scovacis" no mi semee une robe tant lizerute, no?